Meyor Blogue n'Asturianu 2010

Dempués d’un duru trabayu de revisión de votos, ya tamos preparaos pa dar a conocer los ganadores del Meyor Blogue n’asturianu del añu 2010!

• Meyor Conteníu: Fueya en Blanco col 12% de los votos.

• Meyor Diseñu: González y González col 13% de los votos.

• Votu del Públicu: Conceyu Nacional de Liriu col 20% de los votos.

¡¡¡Norabona a los premiaos!!!

Queremos aprovechar pa convidavos al III Sidra & Blogues que se va cellebrar en La Pola, nel conceyu Siero. Nesti III Sidra & Blogues van entregase unos detalles a los blogueros premiaos, vamos poder disfrutar delles charres y facer xuntanza tomando algo cuando termine l’actu. A finales de selmana daremos más detalles del sitiu concretu, la hora y el día, pero va ser enantes del 15 de febreru.

Munches gracies a tola xente que participó y tar sollertes!! Vémonos nel III Sidra & Blogues!!

A partir d’agora ya nun se puen sumar más votos nesta edición de 2010. Ya tenemos camudada la web pa que nun haya la posibilidá de siguir votando, sicasí, esti va ser el sitiu onde vamos espublizar los resultaos finales de les votaciones y el vehículu oficial onde espublizar toles noticies que vayan saliendo.

¿Qué blogues ganaron?

- Durante tol periodu de votación, pudimos ver, en tiempu rial, como diben los resultaos. Ente toes eses votaciones había votos que nun se axustaben a les bases. Agora tócanos revisar esos votos y quitar los que nun sean válidos. Esperamos facelo en un par de díes pa nun demorar muncho la publicación de los nomes de los ganadores. Si estos cambios alteren les posiciones de la tiesta, vamos ponenos en contautu col autor o autora del blogue implicáu, pa explica-y el por qué del cambiu de posición.

Queremos aprovechar pa dar milenta gracies a tola xente que participó votando y que dió difusión a esti proyeutu, espublizándolo nel so blogue, la so páxina o amestándonos como collacios en Facebook y Twitter. Ensin la participación de la xente, estes iniciatives nun tienen sentíu, ensin xente que utiliza l’asturianu como vehículu de comunicación, too esto tampoco nun existiría y sin el esfuerzu de toos y toes, nun demostraríamos añu tres d’añu que la nuesa llingua sigue viva nun mediu de comunicación tan modernu, cambiante y popular como ye la rede de redes. Gracies!.

Siguimos trabayando pa qu’esti conceyu blogueru nun quede sólo en lo virtual y se materialice en carne, pallabres y sidre.

Pero eso ya ye otra hestoria…

Como sabeis, güei ye’l últimu día de les votaciones.

Pa poder facer delles xestiones internes de la base datos y el sirvidor, vamos poner el pieslle a les 20:00 hores de güei. A partir d’ahí, tocará revisar los votos, pa poder desaniciar los que nun se axusten a les bases. Alcordavos que si, por esti motivu, la posición de los blogues de cabeza se viera alterá, vamos ponenos en contautu col autor/a del blogue pa explica-y por qué se anularon los votos.

En unos díes (prometemos nun tardar muncho) espublizaremos equí el nome definitivu del meyor blogue n’asturianu de 2010!!

Tamos percontentos cola participación y la difusión que-y disteis a esta iniciativa, sofitando un añu más que la nuesa llingua sea visible na rede. Nel apartáu del públicu ya hai más de 620 votos!! y son casi mediu centenar los blogueros y blogueres que pasaron por esta páxina a votar. Munches gracies a toos y toes!!

Alcordavos que a les 20:00 piésllense les votaciones!

Nel día d’ayeri acabamos de pasar los 500 votos ente los llectores. Nesta estaya la cosa va decidise los últimos díes ente tres blogues principalmente, pero tovía ta too nel aire. Damos les gracies a tola xente que ta entrando a votar, sofitando esti proyeutu y l’usu de la nuesa llingua nes nueves tecnoloxíes.

Sicasí, tenemos que aclariar que, tamos detectando dellos votos que van quedar nulos por que nun se axusten a les bases de les votaciones. Esos votos tan sumaos agora y sólo al final de les votaciones vamos examinalos pa esborriar tolos que se consideren nulos. Nun lo facemos agora, por que los votos tan llegando continuamente y nun queremos tocar la base datos, asina que cuando se piesllen les votaciones, analizaremos la procedencia de tolos votos y espublizaremos los resultaos finales. Si se ven alteraes les votaciones y polo tanto, la posición de dalgun blogue, vamos ponenos en contautu col autor o autora pa esplica-y cuantos votos consideramos nulos y por qué.

¡¡Entramos na cabera selmana de votaciones!! ¿Tú ya votasti??!